Англамоўная магістратура па версіі БДЭУ

Беларускі дзяржаўны эканамічны ўніверсітэт літаральна на наступным тыдні пачынае набор на англамоўную магістарскую праграму “Міжнародная эканоміка і гандлёвая палітыка”. Ідэя адкрыцця магістратуры на англійскай мове ў БДЭУ з’явілася ў пошуках шляхоў нарошчвання адукацыйнага экспарту і прыцягнення на вучобу замежнікаў. Але гэтая ўнікальная паслуга будзе даступная і беларусам.

Хто і чаму будзе вучыць

— На факультэце міжнародных эканамічных адносін вучыцца большая частка ўсіх замежных студэнтаў універсітэта, — расказвае кіраўнік праграмы, дэкан ФМЭА Беларускага дзяржаўнага эканамічнага ўніверсітэта, доктар эканамічных навук, прафесар Галіна Аляксандраўна ШМАРЛОЎ­СКАЯ. — У роздумах аб тым, як разнастаіць прапанаванне для іншаземцаў, і ўзнікла ідэя аб магістратуры на англійскай мове.

Сумесная распрацоўка магістарскай англамоўнай праграмы пачалася ў межах праекта DААD (Нямецкай службы акадэмічных абменаў), дзе партнёрам  БДЭУ выступіў Берлінскі ўніверсітэт прыкладных навук, які на той момант меў вопыт дапамогі ў стварэнні магістарскіх праграм універсітэтам іншых еўрапейскіх краін. Усталяваць сувязі з Берлінскім універсітэтам удалося праз Віртуальны інстытут Канферэнцыі ААН па гандлі і развіцці (ЮНКТАД), членам якога БДЭУ з’яўляецца з 2007 года.

— Прадстаўнікі Берлінскага ўніверсітэта дапамаглі нам узгадніць вучэбны план аж да мэта­згоднасці ўключэння кожнай асобнай дысцыпліны. Прафесар Ян Прыві чытаў лекцыі ў БДЭУ на працягу тыдня для выкладчыкаў будучай магістратуры. Разам з тым для нашых выкладчыкаў арганізаваны стажыроўкі ў Берліне, дзе ў іх ёсць магчымасць пазнаёміцца з методыкай вя­дзення заняткаў для магістрантаў, доступ да вучэбнай і метадычнай літаратуры ў некалькіх бібліятэках, — працягвае дэкан ФМЭО. — Больш за тое, Берлінскі ўніверсітэт збіраецца фінансаваць лекцыі прафесара Аль Фаёмі, якія той будзе чы­таць для нашых магістрантаў.

Дзякуючы   Віртуальнаму    ўніверсітэту ­ЮНКТАД, у БДЭУ ёсць магчымасць су­працоўнічаць з іншы­мі еўрапейскімі ўніверсітэтамі. Напрыклад, выкладчыкі, якія пачынаюць асвойваць новыя курсы, могуць атры­маць дыстанцыйны доступ да гатовых лекцый па многіх дысцыплінах, кейсаў для студэн­таў, а таксама атрымаць кансультацыйную і метадычную дапамогу.

— Акрамя таго, увесь гэты час мы супрацоўнічаем з Адукацыйным цэнтрам Сусветнай гандлёвай арганізацыі, прадстаўнікі якога, дарэчы, на базе нашага ўніверсітэта праводзілі семінары па праблематыцы СГА, — расказвае Галіна Аляксандраўна. — Праграма магістратуры ўключае шэраг дысцыплін па пытаннях, звязаных з дзейнасцю СГА, таму мы дамовіліся, што асобныя курсы ці хаця б асобныя лекцыі бу­дуць чытаць эксперты Сусветнай гандлёвай арганізацыі, а таксама прадстаўнікі Міністэр­ства замежных спраў Беларусі, якія непасрэдна курыруюць напрамак міжнароднай гандлёвай палітыкі. Але, паводле рэкамендацыі нашых берлінскіх калег, стаўку мы робім, канечне, на сваіх выкладчыкаў, якія валодаюць англійскай мовай. Плануем выкарыстоўваць усе магчымыя варыянты іх навучання, у тым ліку замежныя стажыроўкі.

Такім чынам, падрыхтоўка да адкрыцця англамоўнай магістратуры ў БДЭУ доўжылася каля трох гадоў. Гэты праект з’яўляецца яскравым прыкладам таго, якія магчымасці адкрываюцца перад нашымі ВНУ дзякуючы кааперацыі з замежнымі арганізацыямі, бо менавіта пры садзейнічанні еўрапейскіх партнёраў БДЭУ вырашае галоўную праблему пры адкрыцці падрыхтоўкі на англійскай мове — праблему англамоўных выкладчыкаў. Не менш істотнай стала і дапамога ў вызначэнні зместу праграмы. Большасць яе курсаў, як падкрэслівае Г.А.Шмарлоўская, унікальная і не мае руска­моўных аналагаў у нашай краіне.

Напрыклад, магістранты будуць вывучаць такія дысцыпліны, як “Нацыянальныя стратэгіі краін з транзітыўнай эканомікай”, “Рэгуляванне Сусветнай гандлёвай арганізацыі і міжнародная гандлёвая сістэма”, “Гандлёвыя перамовы і вырашэнне гандлёвых спрэчак”, “Рэгіянальныя гандлёвыя пагадненні” і іншыя. Нездарма аўтары праграмы пазіцыя­нуюць яе як праграму, мэта якой — падрыхтоўка элітных кіраўніцкіх кадраў для сферы міжнароднага гандлю і міжнароднай гандлёвай палітыкі.

Хто будзе вучыцца

Першую англамоўную магістратуру ў БДЭУ невыпадкова вырашылі прысвяціць пытанням міжнароднага гандлю. Гэта вельмі перспектыўны напрамак, па якім зараз адкрываюцца магістарскія праграмы ў краінах Еўропы, у тым ліку і пад эгідай Сусветнай гандлёвай арганізацыі. У СГА сёння ўваходзіць больш за 170 дзяржаў, далучаюцца ўсё новыя краіны. Уваходжанне ў арганізацыю вельмі працяглае, мяняюцца ўмовы гандлю і для новых членаў, таму СГА шмат увагі ўдзяляе падрыхтоўцы кадраў, якія суправаджалі б гэтыя працэсы.

Як пераканана дэкан ФМЭА Г.А.Шмар­лоўская, гэтая ўнікальная магістарская праграма павінна быць даступна для беларусаў, таму што праблематыка міжнароднай гандлёвай палітыкі надзвычай актуальная і для нашай краіны. У 2011 годзе да Сусветнай гандлёвай арганізацыі далучылася Расійская Федэрацыя, з якой Беларусь знаходзіцца ў цеснай інтэграцыі, у прыватнасці ў сферы гандлю праз Мытны саюз. Выпускнікі англамоўнай магістарскай праграмы будуць ведаць і спецыфіку дзейнасці СГА, і асаблівасці гандлёвай палітыкі асобных краін і рэгіянальных інтэграцыйных аб’яднанняў. У БДЭУ ўпэўнены, што беларускія магістры будуць запатрабаваны ў Міністэрстве замежных спраў, Гандлёва-прамысловай палаце, у дыпламатычных прадстаўніцтвах, службах знешнеэканамічнай дзейнасці нацыянальных прадпрыемстваў.

Галіна Аляксандраўна ўпэўнена, што ў недалёкай будучыні ў Беларусі, як і ў краінах Еўропы, абавязковай умовай для заняцця кіраўніцкіх пасад і кар’ернага росту будзе наяў­насць дыплома аб вышэйшай адукацыі другой ступені. Вырашаць задачу паглыбленай падрыхтоўкі спецыялістаў, здольных да інавацыйнай, праектнай, кіраўніцкай дзейнасці ў розных галінах, будзе практыка-арыентаваная рускамоўная магістратура, якая сёлета ўзаконена Кодэксам аб адукацыі.

У той жа час у эканамічным універсітэце разлічваюць і на прыток замежных грамадзян. Патэнцыяльныя спажыўцы новай адукацыйнай паслугі ў БДЭУ — прадстаўнікі тых краін, якія рухаюцца ў бок далучэння да Сусветнай гандлёвай арганізацыі.

Па словах Г.А.Шмарлоўскай, замежнікі заў­сёды, калі звяртаюцца на факультэт міжнародных эканамічных адносін і цікавяцца спецыяль­насцямі, умовамі паступлення, пытаюцца, ці магчыма навучанне на англійскай мове. Такая цікавасць іншаземцаў да англамоўнай адукацыі зразумела: далёка не ўсе хо­чуць губляць год на вывучэнне рускай мовы.

Своечасовасць з’яўлення новай магістарскай праграмы ў БДЭУ не толькі ў тым, што яна вырашае праблему моўнага бар’ера для англамоўных замежнікаў. Часта ў Беларусь едуць за ступенню PHD, але ў нашай краіне ў аспірантуру можна паступіць толькі пасля магістратуры. Акрамя таго, за час навучання па магістарскай праграме можна вывучыць рускую мову на належным узроў­ні, і тады не будзе ніякіх перашкод для вучобы ў аспірантуры.

Застаецца дадаць, што прыём дакументаў на англамоўную магістарскую праграму “Міжнародная эканоміка і гандлёвая палітыка” пачынаецца з 27 чэрвеня і працягнецца да 15 кастрычніка. Заняткі пачнуцца з 1 лістапада пасля тэсціравання па англійскай мове. Ва ўніверсітэце разлічваюць на адказнасць паступаючых і свядомы выбар праграмы. Зрэшты, да гэтага абавязвае і кошт навучання: для грамадзян Беларусі ён складзе 2900 долараў ЗША ў год, а для грамадзян іншых краін — 3500 долараў.

Іна НІКІЦЕНКА.
nikitsenka@ng-press.by
Фота Алега ІГНАТОВІЧА.

 

Такая адукацыйная паслуга, як магістратура на англійскай мове, у нашай краіне з’яўляецца вялікай рэдкасцю. Першымі ластаўкамі, якія пачалі яе прапаноўваць замежным грамадзянам, сталі Беларускі дзяржаўны ўніверсітэт і Беларускі дзяржаўны ўніверсітэт інфарматыкі і радыёэлектронікі. Сёлета да іх далучыўся Беларускі дзяржаўны эканамічны ўніверсітэт, аб’явіўшы аб наборы на англамоўную магістарскую праграму. Яшчэ дзве ВНУ паведамілі аб тым, што ўсур’ёз рыхтуюцца да ўвядзення такой адукацыйнай паслугі. Гэта Міжнародны дзяржаўны экалагічны ўніверсітэт імя А.Д.Сахарава і Інстытут бізнесу і менеджменту тэхналогій БДУ.

Сахараўскі ўніверсітэт плануе пачаць навучанне на англійскай мове ў магістратуры па напрамку “Экалагічны менеджмент” у 2013 годзе. Больш за тое, у ВНУ маюць намер рыхтаваць магістраў па напрамках “Менеджмент узнаўляльных крыніц энергіі”, “Біяінфарматыка”, “Малекулярная біялогія”. У МДЭУ імя А.Д.Сахарава не хаваюць, што адкрыццё англамоўнай магістратуры дазволіць павялічыць экспарт адукацыйных паслуг і прыцягнуць у ВНУ большую колькасць замежных студэнтаў.

Інстытут бізнесу і менеджменту тэхналогій БДУ яшчэ ў мінулым годзе пачаў рэалізоўваць праект “Стварэнне англамоўнай адукацыйнай праграмы МВА”, мэта якога, як вынікае з назвы, — запуск паўна­цэннай англамоўнай адукацыйнай праграмы МВА ў Рэспубліцы Беларусь, акрэдытаванай у адпаведнасці з міжнароднымі стандартамі. У хо­дзе рэалізацыі праекта ствараецца акадэмічная база для англамоўнай праграмы, сучасная матэрыяльна-тэхнічная база для вучэбнага працэсу, ідзе распрацоўка і ўкараненне інфармацыйна-камунікацыйных сістэм навукова-метадычнага забеспячэння, а таксама ствараюцца адмысловыя праграмы прафесійнай падрыхтоўкі для беларускіх выкладчыкаў.

Дарэчы, нядаўна стала вядома, што гэты праект ІБМТ Белдзяржуніверсітэта ўключаны ў Нацыянальную праграму міжнароднага тэхнічнага супрацоўніцтва на 2012—2016 гады (дакумент, у якім донарскай супольнасці прадстаўлена патрэба Рэспублікі Беларусь у міжнароднай тэхнічнай дапамозе).