Тавар — дарога — спажывец

Аперацыйных лагістаў з 2017 года будуць вучыць у Віцебскім дзяржаўным індустрыяльна-тэхналагічным каледжы.

Перш чым трапіць да пунктаў рэалізацыі і спажыўца, любы тавар (а тым больш калі гаворка ідзе пра пастаўкі з-за мяжы) пераадольвае складаны шлях. Каардынуе гэты рух лагіст. Праектаванне, укараненне, эксплуатацыя лагістычных сістэм і іх элементаў з улікам мэт і задач арганізацыі, узаемадзеянне з пастаўшчыкамі і перавозчыкамі, кіраванне складскімі запасамі і дыспетчарскае кіраванне вытворчасцю, складанне планаў продажаў, заключэнне дагавораў, афармленне заказаў на пастаўкі, выбар аптымальных умоў і тэрмінаў дастаўкі, кантроль транспарціроўкі тавараў, каардынацыя і кантроль пагрузачна-разгрузачных работ, забеспячэнне першаснага дакументаабароту транспартна-тэхналагічнага працэсу — гэтыя і шэраг іншых задач уключае сфера дзейнасці прадстаўнікоў азначанай прафесіі. Іншымі словамі, галоўная задача лагіста — арганізаваць сістэму пастаўкі і размеркавання тавараў такім чынам, каб усё пастаўлялася куды патрабуецца, у неабходнай колькасці і ў азначаны тэрмін, і разам з тым звесці да мінімуму накладныя выдаткі, звязаныя з транспарціроўкай і захоўваннем.

— Адпаведна, такія спецыялісты запатрабаваны ў арганізацыях, чыя дзейнасць звязана з пастаўкамі тавараў: спецыялізаваных фірмах, якія аказваюць паслугі ў галіне транспарціроўкі тавараў, буйных гандлёвых сетках, на тых вытворчасцях, куды пастаўляецца вялікая колькасць сыравіны і камплектуючых, — запэўніла адказны сакратар прыёмнай камісіі намеснік дырэктара каледжа Таццяна Бродская. — З новага навучальнага года мы прапануем абітурыентам новую спецыяльнасць “Аперацыйная дзейнасць у лагістыцы” з кваліфікацыяй “аперацыйны лагіст”. Запатрабаванасць лагістаў у нашым рэгіёне абумоўлена многімі фактарамі — ад сусветнай глабалізацыі да існавання значнай колькасці арганізацый, дзейнасць якіх звязана з пастаўкамі тавараў. Мне прыемна сказаць, што наш каледж першы, хто адкрывае ў Віцебску падрыхтоўку па згаданай спецыяльнасці на ўзроўні сярэдняй спецыяльнай адукацыі.

Згодна з зацверджаным адукацыйным стандартам, навучанне па спецыяльнасці прадугледжваецца на аснове агульнай базавай адукацыі тэрмінам на 3 гады 6 месяцаў. Форма атрымання адукацыі — дзённая.

— Адкрыццё падрыхтоўкі па спецыяльнасці “Аперацыйная дзейнасць у лагістыцы” дазволіць часткова задаволіць кадравыя запыты лагістычных цэнтраў краіны, а ў першую чаргу Віцебска і Віцебскай вобласці, — падкрэсліла дырэктар каледжа Ірына Кісялёва. — Атрыманне сярэдняй спецыяльнай, а ў далейшым і вышэйшай адукацыі па скарочанай праграме паменшыць фінансавыя выдаткі на падрыхтоўку высокакваліфікаваных спецыялістаў у гэтым актуальным напрамку эканомікі.

Як паведамілі ў прыёмнай камісіі, навучанне прадугледжвае падрыхтоўку спецыялістаў з трывалымі ведамі ў галіне тэхнікі і тэхналогій, эканомікі, сацыяльна-гуманітарных навук. Адукацыйную дзейнасць будуць ажыццяўляць высокакваліфікаваныя педагагічныя кадры. Правядзенне практычных заняткаў плануецца на базе Віцебскага філіяла Міжнароднага ўніверсітэта “МІТСО”, дзе ёсць аналагічная спецыяльнасць на ўзроўні вышэйшай адукацыі.

Таццяна БОНДАРАВА.