Абітурыенты цікавяцца…

З пытаннямі наконт паступлення абітурыенты звярталіся і ў “Настаўніцкую газету”. Вас мы знаёмім з найбольш складанымі пытаннямі, якія патрабуюць кансультацыі ў спецыялістаў, і адказамі на іх.

Я хварэю на эпілепсію. Хачу атрымаць прафесію, аднак не ведаю, ва ўстанове прафесійна-тэхнічнай адукацыі якога профілю магу вучыцца з такім захворваннем.

Андрэй, Брэст.

***

Калі вам ужо ёсць 15 гадоў, звярнуцца трэба ў падлеткавы кабінет у паліклінікі па сваім месцы жыхарства, дзе і будуць дадзены рэкамендацыі па выбары прафесіі. Улічвацца будуць як вашы пажаданні адносна прафесіі, так і стан вашага здароўя, напрыклад, частата абвастрэнняў хваробы. Калі 15 гадоў вам няма, спачатку звярніцеся да свайго педыятра.

Я збіраюся паступаць у БДУІР, які прапаноўвае навучанне па вялікай колькасці спецыяльнасцей. Пры падачы дакументаў абітурыенты ўказваюць іх у парадку прыярытэтнасці. Няўжо ўсе гэтыя спецыяльнасці (на якой з іх я буду вучыцца, будзе вядома пасля залічэння) павінны быць пазначаны ў медыцынскай даведцы, што прадастаўляецца ў прыёмную камісію?

Дзмітрый, Гродна.

***

БДУІР прапаноўвае навучанне па 35 спецыяльнасцях — па трыццаці спецыяльнасцях тэхніка-тэхналагічнага профілю, дзвюх спецыяльнасцях эканамічнага і па трох спецыяльнасцях на ваенным факультэце. На ваенным факультэце асобныя ўмовы прыёму, да якіх, напрыклад, адносіцца праходжанне прафесійнага адбору. З яго ўмовамі можна пазнаёміцца на сайце БДУІР. Што да спецыяльнасцей тэхніка-тэхналагічнага і эканамічнага профіляў, то на іх таксама праводзіцца асобны конкурс. Таму ў медыцынскай даведцы можа быць пазначана як адна са спецыяльнасцей профілю (нічога страшнага не будзе, калі пасля залічэння вы акажацеся на іншай спецыяльнасці профілю) ці названы сам профіль.

У наступным годзе мая ўнучка плануе паступаць на філалагічны факультэт БДУ. Здаваць ЦТ будзе па французскай мове (менавіта яе вывучае ў школе). Ці мае яна права з сертыфікатам ЦТ па гэтай мове падаваць дакументы на спецыяльнасць “Рамана-германская (нямецкая) філалогія”? Вучыцца хоча менавіта па ёй.

Раіса Іванаўна, Мінск.

***

Падаваць дакументы з сертыфікатам ЦТ па французскай мове на спецыяльнасць “Рамана-германская (нямецкая) філалогія” яна можа. Пры паступленні на гэтую спецыяльнасць здаецца ЦТ па любой замежнай мове. Аднак трэба ўлічыць той факт, што спецыяльнасць “Рамана-германская (нямецкая) філалогія” ўваходзіць у групу спецыяльнасцей, куды праводзіцца агульны конкурс. Гэта значыць, што магчымасць вучыцца па ёй будзе залежаць ад набранай унучкай сумы балаў, якая складаецца з сярэдняга бала атэстата і балаў за тры ЦТ, і ад сумы набраных балаў іншых абітурыентаў. У каго большы бал, той першы выбірае спецыяльнасць, на якой хоча вучыцца, з групы спецыяльнасцей.

У групу, куды праводзіцца агульны конкурс на філалагічным факультэце БДУ, уваходзяць наступныя спецыяльнасці: “Рамана-германская (нямецкая) філалогія”, “Рамана-германская (французская) філалогія”, “Рамана-германская (італьянская) філалогія”, “Усходняя (кітайская) філалогія”. З вопыту мінулых гадоў відаць, што найбольшай папулярнасцю з гэтай групы карыстаецца спецыяльнасць “Усходняя (кітайская) філалогія”. Там назіраецца самы высокі прахадны бал.

Колькі сябе памятаю, столькі, здаецца, мару быць рэжысёрам. Здымаць хачу мастацкае кіно. Ведаю, што гэтаму майстэрству вучаць у Беларускай дзяржаўнай акадэміі мастацтваў. Аднак, зайшоўшы на сайт акадэміі, убачыла, што сёлета набор на рэжысёраў кіно ўвогуле не вядзецца. Чаму? І ці будзе весціся набор у наступным годзе, калі я буду паступаць?

Аляксандра, Слонім.

***

Сапраўды, сёлета набор на кірунак спецыяльнасці “Рэжысура кіно і тэлебачання (кіно)” не вядзецца, прычым ні на адну са спецыялізацый — ні на спецыялізацыю “мастацкі фільм”, ні на спецыялізацыю “дакументальны фільм”, ні на “анімацыйныя дзеянні”. Звязана гэта з тым, што набор на іх праводзіцца адзін раз у пяць гадоў. Набор на рэжысуру кіно і тэлебачання (мастацкі фільм) плануецца ў наступную прыёмную кампанію. У планах на 2018 год — набор групы будучых рэжысёраў анімацыйных дзеянняў, а яшчэ праз год — рэжысёраў дакументальных фільмаў.

Па пытаннях кансультавалася
Святлана ШЫЯН.